Ұстаз… Қандай қасиетті де қадірлі сөз! Адам баласының жүрегінде қадір тұтып, құрметтейтін екі ұғым болса, соның бірі – ұстаз. «Ұстаздан тәрбие алған», «ұстаздың алдын көрген» деген сөздер «ана тәрбиесін алған» деген сөзбен ұштасып тұрғандай. Алғаш рет қолыңа қалам ұстап, өмірге бейімдеп, әлемді танып, қыр-сырын меңгеруге, өмірдің сан қилы құбылыстарын терең түсінуге мұрындық болып, жан дүниеңді нұрландырып, адамдыққа баулыған мұғалімнің бейнесі көңіл төрінен орын алатыны шындық. Ұстаз әр баланың жеке тұлға болып қалыптасуы үшін өз үлесін қоса отырып, жүрегіне білім нәрін сеуіп, әр шәкіртін аялап, өмір атты үлкен ғаламға қанатын қатайтып ұшырады. 
     Тәуелсіздікпен бірге қалыптасып, қатар өсіп келе жатқан қара шаңырағымыздың биыл 30 жылдық мерейтойы. Мектебіміздің тарихынан сыр шертсек, 1991 жылдың
1 қыркүйегінен бастап қазақ орта мектебі статусын алған №34 орта мектебі талай белестерден өтті. Мектептің алғашқы директоры Қорғанбаев Аманжол Салимович қаламыздағы қазақ мектебі болып ашылған білім ордасының өсіп-өркендеуіне зор үлесін қосты. Аманжол Салимович елеулі еңбектерінің нәтижесінде «Қазақстан Республикасының білім беру ісінің үздігі» атағына, «Ы.Алтынсарин» төсбелгісіне, «Қазақстан Республикасының тәуелсіздігіне 20 жыл» медаліне ие болып, құрметті зейнеткерлік демалысына шықты.
      Одан кейін басшылық тізгінін қазақ тілі мен әдебиеті пәні мұғалімі, бірнеше жыл директордың орынбасары қызметін атқарған, тәжірибелі ұстаз Дәмелі Қойбаққызы алды. Қазіргі кезде Алима Жолмуратовна басқарып отырған білім ордасында бар өмірін ұстаздық жолға арнап, қаншама шәкірттерге жол сілтеп, ғылым мен білім, өнер әлеміне қанат қақтырған ұстаздарымыздың арқасында мектебіміздің абыройы артып, даңқы биіктеп келеді.
      Мектепте 56 мұғалім жұмыс жасайды. Қазіргі уақытта мектептің оқу-тәрбие жұмысын директордың оқу ісі жөніндегі орынбасары А.Бекбулатова, директордың әдістеме ісі жөніндегі орынбасары Г.Сатыбалдина, директордың бастауыш кластар жөніндегі орынбасары С.Сарсенгалиева, директордың тәрбие ісі жөніндегі орынбасары Б.Утебаева, директордың шаруашылық ісі жөніндегі орынбасары З.Мырзатаева басқарып келеді. Мектепте 9 әдістемелік бірлестік жұмыс жасайды. Бірлестік жетекшілері: Х.Бекмуратов, Б.Жуманиязова, Ж. Абдраухова, Г.Баймұханова, Р.Алгазина, К.Какенова, А.Ғазизова, А.Есеркенова, С.Дәулетбай.
   «Ұстаздық еткен жалықпас үйретуден балаға» дегендей, бойындағы бар асыл ізгі қасиеттерін шәкірт бойына сіңіріп, жылдар бойы тер төгіп келе жатқан С.Сарсенгалиева , К.Сагинтаева, Г.Төленияз, Б.Жуманиязова, А.Айжарикова, Х.Бекмұратов, Р.Алгазина, А.Джаксыбаева, К.Утарбаева, Ж.Карашолакова сияқты озық тәжірибелі ұстаздарымыздың еңбегі ерен.
   Білім беру саласында тынбай еңбек етіп, өз ісін жетік меңгерген Ж.Абдраухова, А.Бекбулатова, К.Какенова, Г.Сатыбалдина, Г.Азаматова, А.Кунратбаева, А.Жасаганбергенова, А.Жонысова, А.Кубланова, Н.Батыршин, С.Кожабеков, А.Оразова, Г.Демеубаева, Г.Баймуханова, Т.Жусиповадай ұлағатты ұстаздарымыз білімді, білікті шәкірттер тәрбиелеп, әр баланың жүрегінен орын ала білді.
     Оқушыға сапалы білім берумен қатар саналы тәрбие беру жолында Б.Утебаева, О.Абдуллин, А.Ахатова, А.Ғазизова, А.Турикпенбаева сынды жас мұғалімдер де алғашқы еңбек жолын осы мектептен бастап, әлі күнге дейін қызмет етіп келеді.
    «Мұғалім өзінің білімін үздіксіз көтеріп отырғанда ғана мұғалім…»,- демекші, мектебіміздегі мұғалімдердің педагогикалық жолындағы үлкен ізденісі мен білім саласындағы адал қызметтерінің нәтижесі де елеулі болды.
     IV Республикалық «Үздік сынып жетекші» олимпиадасына мектебіміздің 26 класс жетекшісі қатысып, жүлделі І,ІІ,ІІІ орындармен марапатталды және мектебіміз «ҮЗДІК ҰЖЫМ» номинациясын иеленді. Білікті ұстаздарымыз қалалық, облыстық, республикалық көлемдегі әр түрлі мен байқаулар мен сайыстарға, олимпиадаларға қатысып, біраз жетістіктерге қол жеткізді.
     Бірқатар мұғалімдеріміз үздік қызметкер ретінде танылып, «Алтын кітап» республикалық білім және мәдениет саласындағы үздік қызметкерлер энциклопедиясына енді. «Асыл ұстаз», «Тағылым» республикалық ғылыми-әдістемелік журналдарына мақала, баяндама, ашық сабақтар жариялады. Сонымен қатар, ұстаздарымыз педагогикалық іс-тәжірибелерімен бөлісу мақсатында облыстық, республикалық көлемдегі әдістемелік құрал мен электронды орта шығарып, түрлі әдістемелік семинарлар мен ғылыми-практикалық конференцияларға қатысты. Мектебіміздің шығармашылық ізденістегі ұстаздары «Қазақстан ұстазы», «Қазақ тілі мен әдебиеті», «География және тарих», «Ізденіс», «Химия және биология», «Математика және физика», «Педагог хабаршысы», «Ұстаз тілегі», «Білім жолы», «Бастауыш мектеп» сияқты республикалық педагогикалық ғылыми-әдістемелік журналдарға жұмыстарын жариялап, іс-тәжірибелерін таратты.
        30 жылдық тарихы бар киелі білім ордасынан 1366 шәкірт түлеп ұшты. Оның ішінде 56-сы алтын белгі иегерлері. «Адамның адамгершілігі жақсы ұстаздан», – деп ұлы Абай атамыз айтқандай, бар өмірін саналы, өнегелі ұрпақ тәрбиелеуге арнаған ұстаздарымыздың мектептен түлеп ұшқан шәкірттері Қазақстанның түкпір-түкпірінде биіктерден көрініп, беделді жерлерде қызмет атқарып жүр. Атап айтсақ, Ә.Султанова Қазақстандағы БҰҰ өкілі, А.Байқазақов кино саласында белгілі актер, А.Таңатов Будапешт қаласындағы Кароли Гашпар университетінің студенті, Түркі кеңесі мәдени іс-шаралар ұйымдастыру бөлімінің қызметшісі, Ж.Жұбанқосов атақты мүсінші, Ақтөбе қаласындағы Абай ескерткішінің авторы, Е.Құдайберген Ақтөбе облыстық сотының бас маманы, Ж.Чапаева «Рика» телеарнасының ақпараттар бөлімінде журналист, Н.Абілхайырова Қазақ Ұлттық Өнер Университетінің 3 курс студенті, «ең үздік Б.Төлегенова репертуарынан ария орындаушы» арнайы сыйлығының иегері, Р.Төреғали «Ақтөбе қалалық тұрғын-үй коммуналдық шаруашылық, жолаушылар көлігі және автомобиль жолдары» ММ бөлім басшысының орынбасары, В.Есеева АО Еуразиялық банкте транзакциялық бизнес басқармасының бастығы орынбасары, Н.Елеусизов Ақтау қаласы 30153 әуе-қорғаныс күштері әскери бөліміне «авиациялық қозғалтқыштарды регламенттеу» топ басшысының орынбасары, Г.Саламас Нұр-сұлтан қаласындағы Өнер Университетін бітіріп, қазір Ақтөбе облыстық филармониясында әнші болып қызмет етеді.
          Жеке кәсіп саласында жүрген О.Құдайберген, С.Сисеналин, А.Анис сияқты түлектеріміз әлі күнге дейін мектеппен байланысын үзбей, қазіргі мектеп оқушыларына демеушілік көрсетіп, мектеппен үнемі тығыз қарым-қатынаста.
        Қазіргі таңда мектепте 654 оқушы білім алып жатыр. Олардың ішінде қалалық, облыстық, республикалық, халықаралық байқауларға қатысып, жүлделі орындарға ие болып жүрген дарынды, талантты оқушыларымыз да бар. Қорғантаев Махамбет, Зайнулла Аружан «Елбасы Медалі» жобасының қола медаль иегерлері.
      Елбасының: «Болашақта еңбек етіп, өмір сүретіндер – бүгінгі мектеп оқушылары, мұғалім оларды қалай тəрбиелесе, Қазақстан сол деңгейде болады. Сондықтан ұстазға жүктелетін міндет ауыр», – деген сөзіне біздің ұстаздар қауымы үлкен жауапкершілікпен қарап, әрқашан өскелең ұрпаққа саналы тәрбие мен білім беру, тынбас еңбек пен үздіксіз ізденіс жолында шығармашылық білімін шыңдай бермек. Шәкірттерін сарқылмас білім нәрімен сусындатып отырған жаңашылдыққа, шығармашылыққа жаны құштар тәуелсіз еліміздің ұлағатты ұстаздары арқасында алтын ұямыздың тұғыры биік, абыройы асқақ болатынына сенімдімін.
     Тарихқа бай киелі қара шаңырағымыз №34 орта мектеп биыл өзінің мерейтойын тойлағалы отыр. Тәуелсіздігіміздің 30 жылдығымен тұспа-тұс келіп отырған мектебіміздің мерейі үстем болсын! Мектебіміздің білімді, дарынды шәкірттері мен шығармашыл, беделді ұстаздары көбейе берсін! Жаңа заманға қадам басқан Қазақстанның өскелең ұрпақтарын тәрбиелеу жолында ұстаздарымызға үлкен жетістіктер мен биік белестерді бағындыратын шығармашылық табыс, қажымас қайрат тілеймін!